Ооржак Лопсанчап
Лопсанчап Ооржак Чываажык оглу (орус. Лопсанчап Чываажыкович Ооржак; 1903-1977) – Cоциалистиг күш-ажыл маадыры, алдар аттыг малчын.
1903 чылда Чөөн-Хемчик кожууннуң Хөр-Тайга сумузунга арат өг-бүлеге төрүттүнген.
Тыва Арат Республиканың тургустунгандан эгелээш төрээн чуртунга аажок идепкейлиг янзы-бүрү ажылдарга киржип, күрүнеге мал дужаап, тудуг ыяжы белеткеп, тудугларга киржип ажылдап, хүндткелдиг аты чедип алган. 1942 чылдан эгелээш Баян-Тала сумузунуң чагыргазын, 1947-1949 чылдарда Чөөн-Хемчик кожууннуң "Октябрьның 30 чылы" аттыг колхозун башкарып ажылдап чораан.
1944 чылда Тыва Арат Республика ССРЭ-ге каттыжар дилегни белеткеп турган делегацияның кежигүнү.
1958 чылдан эгелеп улуг эвес хой бөлүүн чылда ийи катап төрүдүп шенелде ажылдар кылган түңнелинде чылдың-на 100 баш хойдан 129 баш хураган хүлээп ап турган. Ол уйгу-дыш чок улуг ажылдың түңнели – 1959 чылда декабрь 25-те ССРЭ-ниң Дээди Совединиң Президиумунуң доктаалы-биле Лопсанчап Ооржак Чываажыковичиге Социалистиг күш-ажыл маадыры деп бедик деңнелдиг атты тывыскан.
Дөзү[эдер | вики-сөзүглелди эдер]
Тыва Республиканың Күрүне архивиниң "Социалистиг куш-ажыл маадырлары" деп альбомнуң материалы.