Хаан хүрежи (кино)

«Хаан хүрежи» (япон. バトル・ロワイアル батору ровайару; орус. «Королевская битва») — Косюн Такиминиң бижээн романынга үндезилеп кылдынган, Киндзи Фукасаку деп режиссернуң 2000 чылда үнген кинозу.

Сюжеди

Альтернатив төөгүлүг делегейде Япония дээрге Улуг Чөөн Азиязы деп тоталитарлыг күрүнениң кезек чери болуп турар. Экономиктиг кризис ужурундан, Япония чонунуң 15 хуузу ажылын чидирген. Ооң школачылары ол дээш өөредилгезин уламчылавазын оралдашканнар. Олар ынчап турганында, тус черниң күрүнези «Хаан хүрежи» деп тускай өөредилге-эртем талазында проектини кылып ажыткан.

Бир япон школаның өөреникчилер клазы-биле катай баар дээн экскурсияже автобуска халдып органнар. Кайыындан өжегерээн үндүрген газ-биле уругларны удудуткаш, соонда оларны катап оттургаш күжү-биле шуптузун бир өрээлче солдаттар киир ойлаткан, бичии болгаш клазының башкызы Китано деп ашак кижи аныяктарга «оюннуң» дүрүмнерин чугаалап берген. Чаңгыс класстың өөреникчилери бир куруг ортулукта турар, 3 хонук дургузунда 42 школачы бот-боттары-биле чокшуп-бержип, аткылажып тургаш, олардан чүгле чаңгыс дириг ортулуктан үнер боор деп ол педагог четингир херектиң ужурунче киирип, тайылбырлаан. Үш хонук эрткенде, диригге арткан кижи саны чаңгыстан улуг боор болза, школачыларга кеттирген мончарлары шуптулары частып каар.

Оюн киржикчиге херек чүүл курлавырлыг рюкзак берип каар, иштинге чем, бирги херектиң эт-херекселдери болгаш согур дужу-биле хувааттынган чаңгыс соок азы октуг чепсек суп каан боор: бир кижиде боо-даа боор, өскези балдылыг, олардан үшкү күжүр кижи чүгле кастрюля аксын тудуп алган боор, ындыг чижектиг. Өлүржүр дээн өөреникчилер чамдыктары бөлүктежип, бот-боттарынга дузалажып өске удур бөлүктерни чок кылып болур, чүгле дөмей-ле эш-талалакчылар турган арткан кижи үе четпээнде олардан кым чааскаан дириг артарын шиитпирлээр ужурлуг.

Ол кинонуң кол маадырлары Сюя Нанахара биле Норико деп чаңгысклассчызы. Адактың сөөлүнде олар ийилээ биле өске Сёго Кавада деп классчызы артарлар. Олар мончактарны канчап уштуурун билгеш, ынчалгаш, проекти кол хайгаарылга бажыынче четкен, башкызын өлүргеннер. Арткан кижи үжелээ ортулуктан ырадыр, тып алган хемини мунуп эштип бар чыдырда, Кавада алган балыгларындан оожум, тайбыңыы-биле өлүр.

Ойнаан рольдар

• Тацуя Фудзивара — Сюя Нанахара
• Аки Маэда — Норико Накагава
• Таро Ямамото — Сёго Кавада
• Такэси Китано — Китано
• Ко Сибасаки — Мицуки Сома
• Масанобу Андо — Кадзуо Кирияма
• Тиаки Курияма — Такако Тигуса

Алган шаңналдар

• 2001 — Японияның киноакадемиязының дараазында 6 шаңналдарынче идир үндүрттүнген: эң эки фильм, эң эки режиссёр (Киндзи Фукасаку), эң эки актер (Тацуя Фудзивара), эң эки хөгжүм уделгези (Масамити Амано), эң эки сценарий (Кэнта Фукасаку), эң эки үн дизайнызы (Кунио Андо);
• 2001 — Японияның киноакадемиязының 4 шаңналын алган: эң эки монтаж (Хирохидэ Абэ), чылдың эң эки чаа актеру (Тацуя Фудзивара биле Аки Маэда), эң-не сураглыг фильм;
• 2001 — япон «Көк Лента» (Blue Ribbon) кинопремиядан эң эки фильм болгаш эң эки чаа актер (Тацуя Фудзивара) дээш 2 шаңналга алган.
• 2001 — Ситжес хоорайда болган Каталон кинофестивалында эң эки фильм номинациязынче үндүрттүнген.

Үнелел

Rotten Tomatoes сайтызынга 87 хуу кылдыр үнелеттинген, ортуку демдээ — 7,5/10.

Квентин Тарантинонуң саналы-биле тургустунган, 1992 чыл тура бээр үнген тергиин эки фильмнерниң даңзызында, чээрби черден биргизин алган. Ындыг болганда алдарлыг сценарист япон «Хаан Хурежи» деп кинону бо шагнын эң-не тергиин кинозу деп санап турар.

Уламчызы

2003 чылда «Хаан хүрежи 2» деп уламчызы үнген.