Витамин В2
ВИТАМИН В2 — ону рибофлавин деп-даа адаар. Витамин В2 мөөгүлерде, ногааларда, тарааларда дээш өске-даа үнүштерде хөй. Дириг амытаннардан алдынган чемнерде эътте, баарда, бүүректерде, сүтте, эң ылаңгыя инек сүдүнде, дагаа чуургазында кончуг хөй. Улуг кижиниң В2 витаминге хереглелиниң хемчээли хонукта 2,5 мг-га деңнежир. Витамин В2 белоктарның болгаш үстерниң эът-мага-ботка тургустунуп, хууларынга, ижин-шөйүндүнүң, баарның чогумчалыг ажыл-чорудулгазынга, организмге ханның тургустунарынга, уруг савазында уругнуң өзүп сайзыраарынга,карактың көскүзүн экижидеринге эң-не ужур-дузалыг витамин болур. Эът-мага-ботка В2 витамин чедишпес болза, эриннер чарлып хорлаар, чырыктар кестип ханзыраар, аас ишти кемдиир болгаш ооң ишти чытталып баксыраар. Ол ышкаш арынның, холдуң кежи кургап хорлаар, карактың чуга карттары кызып хувулар, чаш төктүр, ажыыр, чырыкка далып аарыыр апаар. Ындыг кижи чем чиир хөөн чокталыр, баш аарыыр, ажыл кылыр шаа, омаа шуут чидер. Ынчангаш медицинада В2 витаминни бо хевирлиг аарыгларга болгаш кижиниң эът-мага-бодун ниити быжыглаар сорулга-биле делгеренгей ажыглап турар.
Дөзү
[эдер | вики-сөзүглелди эдер]- Доржу Көк-оолович Куулар, Тана Монгушевна Куулар - "ЛЕКАРСТВЕННЫЕ РАСТЕНИЯ В ТУВЕ"