Дойбан Дапыянович Даваа

Даваа Дойбан Дапыянович (1931 ч., Каа-Хем кожуун, Ильинка суур) - Ильинка суурнуң мурнакчы механизатору, үш "Ленин ордениниң" кавалери.

Күш-ажылы

931 чылда Каа-Хем кожууннуң Ильинка суурунга төрүттүнген.

Августуң кааң хүнү шөлдү кедергей изидип, оя чип турган. Кызыл-тас далай дег чалгып чыдар ол шөлге чайның бүгү изии чыглып келген-даа ышкаш. Тарылга шөлүнүң чоогунда улуг эзимден сериин салгын безин келбестээн. Ындыг-даа болза, комбайннар алдын-сарыг кызыл-тасты кестирип, бастырып, оожум болгаш бүзүрелдиг чоруп турган. Комбайнның савазы долган тарааны медээ-биле келген автомашинага чүдүрүп бээринге шаг-үе шоолуг негеттинмес. Чаа дүжүттүң тараазын чүдүрген шууштур чоруп-ла турганнар. Кестинген, бастынган, арыглаан кызыл-тастан хосталган комбайннар улаштыр база-ла чоруп, чиигей берген ышкаш, шуужуп турганнар.
Дойбан Даваа «Тиилелге» совхозтуң тарылга шөлдеринге баргаш, кожаларының дуржулгазын өөренип көрген. Дүжүт ажаап алырының учедун хүн, шак санында эвес, а харын минута бүрүзүнде хынмачалыг кылыр «Тиилелгеде» тургузуп турарын ол эскерген. Бир чолаачы канчап,каяа элээн каш минута дургузунда саадай бергенин совхозтуң удуртукчулары аалчы көрүп турда безин, оон айтырганнар. Чүдүрген тарааны дүжүрүп алгаш, саадай бергенин чолаачы тайылбырлаан. Тараа хүлээп алыр черниң ажылында ол саадаашкынның чылдагаанын дораан чайлаткан. Мурнакчы механизатор Дойбан Даваа Кур чер суурдан ээп келгеш, дүжүт ажаалдазының изиг түлүк үезинде бүгү ажылды минута барымдаалап кылыр ужурлуг-дур деп, чогуур түңнелди кылган. Дүжүт ажаалдазынга звено бир шакты камнап алыр болза, ол камнаашкын чүс центнер тараага деңнежир. Ильинка суурнуң механизаторлары дүжүт ажаалдазының кидин түлүк үезинде ол шак дээш шиитпирлиг демисежип келгеннер. «Тараа шөлү-тараа шаңы» деп шууштурулгага улуг чаартылганы кылган. Ынчаарда кижи бүрүзүнүң канчаар ажылдааны шак санында-ла илдең көстүр апарган. Ынчангаш бүгү механизаторларның сагыш-сеткили сергеп, сорук кириишкинниг ажылдап, чаа дүжүттүң тараазының бир үрезини-ле дээш демисежип эгелээннер.
Д.Д. Давааның ужурткан комбайн-трактор звенозу кезээде шалыпкын ажылдап турган. Звено ол күзүн 60 муң ажыг центнер тарааны бастырып, аргылап, ажааган. Комбайнерларның ажылын организастаанының чаа хевириниң ажыктыы, бедик бүдүрүкчүлүү бүрүн бадыткаттынган. Күш-ажылчы, чарышты шак ынчаар организастааны чаагай үре-түңнелди берген. Д.Даваа дүжүт ажаалдазын чээрби чыл дургузунда чорудуп келгеш, 140 муң центнер тарааны күрүнеге ажаап берген.Ол үш чүс вагон хлеб-тир!

Шаңналдары

Ол бердинген күш-ажылдың түңнели – үш Ленин ордени, Күш-ажылдың Маадыры аттың алдын медалы болгаш медальдар бооп, ооң хөрээн каастапкан.