Достай, Елена Евгеньевна

Елена Евгеньевна Достай (1969 чылдың март 8, Тоора-Хем суур, Тожу кожуун, Тыва АССР, РСФСР, СССР) — тыва совет болгаш и российжи ча адыкчызы. Россияның алдарлыг спорт мастери (ча адары).

Намдары

Елена Евгеньевна Достай 1969 чылдың март 8-те Тыва АССР-ниң Тожу кожуунунуң Тоора-Хем сумузунга төрүттүнген. Бичии турда, ада-иези Таңды кожуунунуң Бай-Хаакче көже берген турган.

Чажында Елена чажыт өөрүнден чүнүң-биле-даа ылгалбайн турган. Оон туржук, аарыычал уруг бооп өзүп олурган. Чүгле ада-иезиниң: ачазы — ча адарынга спорт мастеринге кандидат Евгений Тутатчиковтуң база авазы — ча адарынга ССРЭ-ниң спорт мастери Раиса Тутатчикованың ачызында ол чүгле кадыын экижидип эвес, а улуг бедикче үнүп шыдаан. Ачазы, чижек кылдыр, уруу-биле ниити күш-дамыр белеткелин чорудуп: хаактыг маңнаарын, волейбол, баскетбол ойнаарын, гантельдер-биле холдар шыңганнарын быжыктырарын чедип ап турган. Чүгле даштындан көөрге, ча адарын шиңгээдип алыры белен ышкаш. А херек кырында эки түңнел чедип алыры кончуг нарын, кончуг берге. Харыысалгалыг үеде кошкаш кылынмас дизе, согун бүрүзү караже ужугуп, ооң дал ортузунче кадалзын дизе, быжыг нерви системазындан, бодун туттунуп билиринден аңгыда, эвээш эвес күш-шыдал херек.

Лена эң баштай он алды харлыында даштыкы чурт — Венгрияга аныяктар аразынга "Найырал" деп маргылдаага киришкен. Аңаа ол ийиги черни ээлээн. Ооң соонда, оон-даа чугула чедиишкиннерни чедип ап, чурттуң чыынды командазынче кире бергеш, ол Польша, Голландия, Соңгу болгаш Мурнуу Көрей, Турция, Чехия, Швейцария, Швеция, Франция болгаш адак соонда Атлантага, Олимпий оюннарынга, чедип каапкан.

Баштайгы тренери — Р. С. Тутатчикова.

Тренери — Е. В. Тутатчиков.

Чедиишкиннери

Европа чемпиону (1994 — лично, 2002 — команда),

Делегейниң бирги чери дээш маргылдааның мөңгүн (1993, 1995) база хүлер (1989) шаңналының эдилекчизи.

Европаның ажык эвес черге мөңгүн (2002) база хүлер (2004) шаңналдарының эдилекчизи.

Россияның 4 дакпыр чемпиону.

Атланта биле Афиныга болуп эрткен Олимпий оюннарының киржикчизи (1996, 2004).

Хууда чуртталгазы

Кызылда чурттап чоруур. 1992 чылда Кызылдың күрүнениң педагогика институдунуң доозукчузу. 1997 чылда Тыва телевидениениң ажылдакчызы О. Достай-биле өг-бүле туткаш, ооң фамилиязын эдилеп чоруур. 1998 чылдан тура тренерлеп ажылдап чоруур.

Дөс

Елена Евгеньевна Достай // XX чүс чылда Тываның алдарлыг кижилери. Тыва Республиканың күрүне ному. Кызыл, 2004. А. 308.

Шөлүглер

1. Спортсмены, тренеры, интервью, биография: Елена Достай (Тутатчикова)

2. Елена Достай: Стрельба из лука - это философия

3. Достай Елена Евгеньевна

4. Большая биографическая энциклопедия: Достай, Елена Евгеньевна