Серекей Сергей Агван оглу

Серекей Сергей Агван оглу (Серекей Кол Агбанович) (1913 ч. - 1958 ч.) – Тыва Арат Республиканың бир дугаар эртемдээн эмчилерниң бирээзи.

Намдары

Серекей Сергей Агван оглу 1913 чылда январь 1-де Тыва Арат Республиканың Тожу кожуунунга төрүттүнген.

Сергей 3 харлыг турда авазы чок апарган, ооң соонда ону соңгу иезиниң угбазы азырап өстүрүп каан.

1921 чылда 8 харлыг Сергейни Кызыл хоорайже школа-интернатче өөредип чоруткан. Школачы уелерде ол бодун угааныг, кичээнгейлиг, салымныг өөреникчи болуп школа-интернатты өөренип дооскан.

Ол уеде чаа тургустунган Тыва республикага эртемниг национал каадыржаан ажылчыннар чедишпейн турган. 1927 чылда Тыва Арат Республиканың Чазааның негелдези-биле Серекей Сергейни Ленинградтың Чөөн чүк институдунуң ажылчы факультединче өөренип чоргускан. Ажылчан факультетти дооскаш ол С.М. Киров аттыг Ленинградтың эмнелге академиязынга 4 чыл иштинде дыңнакчылып турган. 1938 чылда кадык талазы-биле бергеде бергеш Тываже чанып келген. Тываның кадык камгалалы ону Барыын-Хемчиктиң кожуун эмнелгзинче ажылдадып чоргускан. Ол эмнелгеге түр када ажылдааш, Ленинградче улаштыр өөрениили-биле чорупкан. 1941 чылда Ленинградтың 2-гм эмнелге институдун чедиишкиниг дооскаш, төөрээн Тывазынга эглип келген.

1941-1943 чылдарда Кызыл хоорайга аъттыг шериг кезээниң санитарлыг албаның даргазы болуп ажылдай берген. 1943 чылда май 13-те Тыва Арат Республиканың Чазаа ону Тыванын кадык камгалалының сайыды кылдыр томуйлаан.

Тыва Арат Республика ССРЭ-ге катышканда, 1948 чылга чедир Тываның областың кадык камгалалының эргелекчизи болуп ажылдап чораан. Дараазында чылдарда Серекей С.А. удуртукчу албан-дужаал ажылдарынга даа, бөдүүн эмчи даа болуп ажылдап чораан. Ол дээрезинде боду идекпейлиг хөй-ниитилел ажылдарын чорудуп, Тыва АССР-ның Дээди Совединиң депутады кылдыр бир удаа эвес соңгутуруп турган.

Сергей Агван оглу кончуг дээн угааныг, эртемниг, сонуургак кижи чораан, ол тергиин 4 дыл билир турган: моол, немец, орус, тыва.

Шаңналдары

• 1942 чылда Тыва Арат Республиканың Биче Хурал Президиумунуң Хүндүлүг бижии.
• 1946 чылда СССРЭ Дээди Совединиң Презудиумунуң Чарлыы-биле "Шылгараңгай күш-ажыл", "Германияны тиилээн дээш" медальдар.
• 1958 чылда январь 26-да Кызыл хоорайга ол хенетен мөчээн. Амгы уеде ооң мага-боду Кызыл хоорайнын чевээнде хөөржүтүнген.

Дөзү

1. Тыва Республиканың Күрүне архиви, фонд з82, опись1, херек 22, арыннар 1-3
2. ХХ чүс чылда Тываның алдарлыг кижилери. Тыва Республиканың Күрүне ному -Тываның ном үндүрер чери, Кызыл, 2004 ч.