Угаан сайзырадыр сес одуруг

Угаан чаажыктырар сес одуруг – Төвүттүң "Буга-Даа" чурттуг, Геше Дорже Сеңге деп башкының шаанда-ла бижээн кыска сес одуруглуг шүлүү. Бо шүлүкте бо үе чадазында кижилерниң сагыш-сеткилинде эвээжеп бар чоруур үнелиг бодалдар, азы сагыш-сеткилди чымчадып делгем кылдыр сайгарар көрүштер кирип турар. Ынчангаш амгы үеде Өөредиг тайылбырлап чоруур көвей башкыларның сүмези, бо одуругларны эки сайгарып алгаш амыдыралга боттандырар болза ажык-дузазы аажок улуг деп тайылбырлаан.

Сес одуруг

               1
Дээди сорулга чедип алыр дээш,
Делегейниң амылыг амытаннарын,
Эртине «читамани» деп даштан артык,
Эгүүр-мөңгеде үнелеп, бодап чорууйн.
               2
Каяа-даа, кым-даа-биле ужурашсымза,
Хамык көрүжүм бодумга чавыс болуп,
Өскелерни сеткилимниң ханызындан
Өрү көөрүн чугула деп сактып, бодаайн.
               3
Алдынымны сарыылымга кадартып,
Багай бодал угаанымга киргелекте
Бачыттыг үүле-херек эгелезе,
Арга-биле соксадырын кызып чорууйн.
               4
Чаңы багай бойдус сиңген амылыглар
Чаттыг каржы хора кылып чедип келзе,
Эртинелиг уургайны тыпканы дег,
«Экизин» дээн бодал-биле саадап көрейн.
               5
Адааргалдан үнүп келген сеткилдерниң
Тииренчии-даа, каржызы-даа тыптып келзе,
Аштырыгны чииги-биле хүлээп алгаш,
Тиилелгени өскелерге өргүп чорууйн.
               6
Кажан-на бир дуза кадып чораан өңнүүм,
Идегелим болуп чораан акы-дуңмам
Хора күзээн сеткил долган чедип келзе,
Илиг чокка башкым кылдыр көрүп чорууйн.
               7
Кыска утка мындыг ийин, өңнүктерим:
Ажык-дуза, аас-кежикти өргүвүшаан,
Арат-чонга, өскелерге бараан болуп,
Аваларым човулаңын бүгүдезин
Ал бодумга чажыт кылдыр хүлээп чорууйн.
               8
Бо-ла бүгү өөредигни сагывышаан,
Кузум-хирге хензиг-даа бол борашпайын,
Бүгү чүүлдү «чиргилчин» дег көре бергеш,
Күзелдерниң доңундан мен хосталы бээйн !