Доңгак, Вячеслав Октяброович

Вячеслав Октяброович Доңгак

Вячеслав Октяброович Доңгак (август 22, 1955 төр.) — 2010-2014 чч. Тыва Республиканың Уран чүүл сайыды (Тыва Республиканың Культура сайыды), Тыва Республиканың уран чүүлүнүң Алдарлыг ажылдакчызы. 1992 чылдан тура Тываның Күрүне филармониязының «Саяннар» деп ансамблиниң удуртукчузу, 2007-2009 чылдарда Тыва Республиканың культура болгаш информациялыг политика сайыды, 2009-2010 чылдарда Тыва Республиканың культура болгаш туризминиң сайыды кылдыр ажылдаан. «Культурада чедиишкиннери дээш» хөрек демдээниң, «Шылгараңгай күш-ажыл дээш» медальдың эдилекчизи.

Вячеслав Октяброович 1955 чылдың август 22-де Тыва АССР-ниң Улуг-Хем кожууннуң Хайыракан сумузунга төрүттүнген. 1977 чылда А.В.Луначарский аттыг театр уран чүүлүнүң Күрүне институдун «Режиссура балета» деп мергежил-биле дооскан. 1974 чылдан тура «Саяннар» деп күрүнениң ыры-сам ансамблинге балет артизи бооп ажылдап эгелээн. 1982 чылдан эгелеп Тываның хөгжүм-шии театрының база «Саяннар» күрүнениң ыры-сам ансамблиниң балетмейстери, 1992 чылдан тура ансамбльдиң удуртукчузу. 2002 чылда Республиканың юридика лицейиниң эстетика башкызы болуп ажылдаан, 2003 чылда Кызыл хоорайның мэриязының культура салбырының начальниги, оон даргазы болуп ажылдаан. 2007-2009 чылдарда Тыва Республиканың культура болгаш информациялыг политика сайыды, 2009-2010 чылдарда Тыва Республиканың культура болгаш туризминиң сайыды кылдыр ажылдаан. 2010 чылдан тура Тыва Республиканың культура сайыды.