Сагды, Клара Чамыяңовна

Клара Чамыяңовна Сагды
Төрүттүнген хүнү	1930 марттың 15(1930-03-15) (94 хар)

Клара Чамыяң уруу Сагды (орус.  Клара Чамыяңовна Сагды , англ.  Klara CHamyyaң uruu Sagdy март 15, 1930 чылда төр.) — тыва шии артизи, режиссер, драматург, чогаалчы, Тыва АССР-ниң культуразының алдарлыг ажылдакчызы.

Намдары

К. Сагды 1930 чылдың март 15-те Тыва Арат Республиканың Чөөн-Хемчик кожууннуң Шеминиң Кожагар-Өдекке төрүттүнген. Шеми, Бай-Хаак эге школаларынга, Кызылдың 2 дугаар школазынга өөренген. Ленинградтың Н. Островский аттыг театр институдун база Күрүнениң кинематография институдунуң аспирантуразын дооскан.

Кызыл-Даг, Хорум-Даг, Шеми школаларынга башкылаан, шии артизи болуп, Тыва радио, телевидение комитединге режиссер кылдыр, Улусчу чогаадылга бажыңынга сектор эргелекчилеп, 1973-1976 чылдарда республиканың культура яамызының оралакчы сайыдынга, Тываның хөгжүм-шии театрының режиссерунга ажылдаан. 1993 чылдан тура Россияның ачы-буян биле кадыкшыл Фондузунуң Тывада салбырының даргазы болгаш президентизи.

Клара Чамыяңовна 1957 чылда «Кыстың оруу» деп шиини чогааткан. «Чаңгыс көжегелиг шиилер» деп ному 1963 чылда чырыкче үнген, дараазында «Тыва театрның тывылган төөгүзү» (1973), «Кыстың оруу» (1985) деп номнары парлаттынган. Бижээн шиилерниң чамдыызы 1976 чылда үнген «Чалым-Хая» деп бөлүк чогаалчыларның чыындызында кирген. Ооң чогаалдары орус, хакас, бурят дылдарже очулдуртунган.

Тыва Республиканың Чогаалчылар эвилелиниң кежигүнү. ССРЭ-ниң «Хүндүлелдиң демдээ» орден-биле, «Күш-ажылдың хоочуну» медаль-биле, Тыва Республиканың «Шылгараңгай күш-ажыл дээш», Россияның Херээженнер эвилелиниң медальдары-биле шаңнаткан.

Дөс

1. «Тываның чогаалчылары / Писатели Тувы» 2000 чылда үнген ном