Алдын-Булак

Этнокультурлуг комплекс "Алдын-Булак"

"Алдын-Булак"

Алдын-Булакта чадырлар

Алдын-Булакта өг

Алдын-Булак — этно-культурлуг комплекс. Ол Тыва Республиканың девискээринде, Кызыл - Шагаан-Арыг автотрассазының соңгу чүк талазында, Кызыл хоорайдан 45 км ыракта Балык-Хараар деп черде турар.

Төөгүзү

Алдын-Булак 2010 чылда Тыва Республикага чарлаттынган Туризм чылында тыва чоннуң национал онза чүүлү, фольклору, национал амыдыралы салдарлыг болган бот-амыдыралдың культура комплекизин тудар деп онзагайлыг бодал-биле ажыттынган. Төлевилелди ТР-ниң Культура яамызы күүседип кылган.

Тургузуу, идеязы

Турисчи комплекстиң тудуг-архитектурлуг шиитпирлер үндезининде ийи үзел-бодал салдынган: экологтуг арыг-силии болгаш национал онза чүүлү. Ону каасталгазында скиф культуразының кезектерин болгаш тыва чоннуң чаңчылчаан амыдыралының элементилерин ажыглааш, Октаргай хевирлиг кылдыр туткан. Комплекс ресторан-өгден, 8 «президент» VIP-өглерден, эконом-класстың 7 өөнден, одаглыг 5 тожу чадырдан, спортчу шөлчүгештен, чоок-кавы девискээрлерни бараалгап көөр кыры серилиг бедик черлерде бичии тудуглардан, сауналыг чунар-бажыңнардан, суй-белек кылыгларын садар садыгжыгаштан, администрация бажыңнарындан болгаш авто-машиналар турар черлерден тургустунган.

Өглерниң каасталгазында республиканың онзагай төөгүзүн болгаш культуразын көргүскен. Өзек кылдыр тыва чоннуң ёзу-чаңчылдыг амыдыралының кезектерин алган. Оларның иштин «Аржаан-1» болгаш «Аржаан-2» скиф үезиниң сураглыг базырыктарындан тывылган материалдарның улгаттыр кылган хоолгалары-биле каастаан. Ханаларында тоолчаан скифтерниң янзы-бүрү амыдыралын көргүскен чуруктарны азып каан. Өг-ресторан 6 зонага чардынган болгаш, 100 олуттуг.

Хөөмей-сыгыт төвү

Этно-культурлуг комплексте хөөмей-сыгыт школазы база ажыттынган. Ында сыгыт-хөөмейге тураскааткан чүдүлге демдээ — «Хөөмей оваазын» — дээрже угландырган «алдын согунну» тургускан. Ооң утказы — аалчылар болгаш тыва хөөмей-сыгыттың мөгейикчилери Оваадан хөөмей күүселдезинге өөренип алырының чөпшээрелин тускай ёзулал-биле дилеп алыры. Ол дээрге Тываның визиттиг карточказында хөөмей-сыгытка бүгү делегейде бир дугаар болгаш кара чаңгыс тураскаал бооп турар.

Дөзүк

• www.tuvatour.travel Archived 2014-12-18 at the Wayback Machine
• Солун «Шын», № 92-93 (18519-20), 2014 ч. август 2.