Бажың-Алаак

Чурттакчылыг чер
Бажың-Алаак
Чурт	Россия
Шак куржаа	UTC+7:00[d]
Чурттакчы чон	1204 к. (2021)
Почта индекзи	668114

Бажын-Алаак (тыв. Бажын-Алаак) — Тыва Республиканың Чөөн-Хемчик кожуунунда суур. Чадаана сумузунуң административтиг төвү болгаш чаңгыс чуртталга чери.

Географиязы

Чадаана хемниң эриинде арга-арыглыг черде суур. Суурнуң мурнуу болгаш мурнуу-чөөн талазында тайгаларлыг, Таңды-Уула сыннарынга хамааржыр даглар. Соңгу-чөөн кезээнде Баян-Дугай деп улуг даг бар. Совет Эвилелиниң үезинде маңаа "Искра" совхозу турган.

Кудумчулары

Ак-Судак куд., Амаа Монгуш куд., Карл Маркс куд., Саая Доржу куд., Улуг Кежиг куд.

Суурнуң кыдыында (суур статузу четпээн) черлер бар: Арыг-Бажы, Белдир Бажы, Кызыл-Хавак, Терек, Чаңгыс-Хадың, Чиңге-Даг, Чодар, Шарлан, Шиви Кудуруу.

Төөгү

Бажың-Алаак суурнуң мурнуу-чөөн талазында суурга чыпшыр бурунгу уйгур үезиниң дойдан кылган хоорайы бар. Ооң узуну – 375 м, калбаа – 538 м, ниити шөлү – 18,2 гектар.

Бажың-Алаактан ырак эвесте Чадаана талазынче 5 хире км черде Үстүү-Хүрээ турар. Тыва Арат Республика тургустунар мурнунда маңаа Хемчик кожуунунуң ноянының чазак чери турган.

1959 чылда Бажың-Алаак суурга Андрей Апсолон деп режиссернуң бир дугаар тыва "Ак-көк хемниң кижилери" деп кинозун тырттырып турган.

Чурттакчы чону

1. Н/Д
2. Н/Д

Сураглыг чурттакчылары

• Ховалыг, Кайгал-оол Ким-оолович — (1960, Бажың-Алаак) — Тываның Улустуң хөөмейжизи, Хүн-Хүртү бөлүүнүң ыраажызы, Россияның алдарлыг артизи (1994).
• Хунаштаар-оол Сурун-оолович Ооржак (1932 чылдың сетябрь 11, Муңгаш-Ак деп чер, Бажың-Алаак суур, Тыва Арат Республика — 1993) — Тыва Республиканың Улустуң хөөмейжизи.
• Ондар Монгун-оол Дуктенмеевич (1975 чылдың июль 23, Бажың-Алаак суур, Чөөн-Хемчик кожуун, Тыва АССР) — Тыва Республиканың Улустуң хөөмейжизи.
• Куулар Татьяна Маннай-ооловна (1949) — Тыва Республиканың өөредилгезиниң алдарлыг ажылдакчызы, РСФСР-ниң спордунуң хоочуну, Бажың-Алаак ортумак школазынга өөренип турган.

Транспорт

Чадаана болгаш федералдыг Р-257 трассаның чанында. Чадаанадан Бажың-Алаактың аразында орукта Үстүү-Хүрээ дужунга чедир асфальт чаттынган.